Qeveria kineze ka reaguar me zemërim ndaj asaj që quan shkelje të kryera nga gjigandi amerikan i internetit Google ndaj një premtimi të shkruar se do të respektonte ligjet e Kinës.
Këto ligje kërkojnë që rezultatet që dalin nga kërkimet në faqen e internetit Google, të kalojnë përmes filtrave.
Indinjatata e Kinës erdhi pas vendimit të kompanisë Google për t'i dërguar të gjitha kërkimet që bëhen nga përdoruesit në Kinë, tek faqja e pacensuruar e internetit në Hong Kong.
Një zyrtar i lartë kinez, tha se vendimi i Google për të injoruar premtimin e dhënë ishte totalisht i gabuar.
Televizioni shtetëror kinez citoi zyrtarin të thoshte gjithashtu se akuzat ndaj Kinës lidhur me sulme ndaj faqeve të saj në të kaluarën ishin të paarsyeshme.
Por një korrespondent i BBC-së në Pekin thotë se megjithëqë që kërkimet do të adresohen tek një faqe në Hong Kong, kërkimet për çështje të ndjeshme në Kinë, do të marrin përgjigjen "faqe e pavlefshme".
Akuza për spiunazh
Media shtetërore kineze, e ka akuzuar kompaninë Google si vegël të qeverisë amerikane.
Një kryeartikull mjaft i ashpër i botuar nga agjencia e lajmeve, Xinhua, bën të ditur se kompania është duke u përpjekur të infiltrojë në kulturën dhe vlerat e Kinës.
Google paralajmëroi në fillim të vitit se hyrjet e shumta pirate dhe censura do ta detyronin të tërhiqej nga Kina.
Dhe kur kanë mbetur vetëm 3 javë deri në marrjen e një vendimi përfundimtar, Pekini duket se ka zgjedhur luftën verbale.
Ai thotë se Google është e politizuar, bashkëpunon me qeverinë amerikaen dhe agjencitë e zbulimit dhe është një vegël shkatërruese.
Kërcënimi i kompanisë Google për t'u tërhequar është përshëndetuar nga përdoruesit liberalë të internetit dhe nga administrata Obama.
Por analistët e biznesit thonë se një tërheqje nga tregu më dinamik i internetit do të mund të dëmtonte perspektivën globale të kompanisë./bbc/